القائمة الرئيسية

الصفحات

ازاي اروح معرض الكتاب الجديد 2020 بالمواصلات والمترو

ازاي اروح معرض الكتاب الجديد بالمواصلات والمترو
معرض الكتاب الجديد الدورة 51 لسنة 2019-2020

عنوان معرض الكتاب الجديد 2020 التجمع الخامس بالتفصيل

 - معرض الكتاب القديم كان موجود في مدينة نصر في ارض المعارض ولكن الدورة الجديدة للمعرض السنة دي 2020 هتبقي مقامة في معرض الكتاب في التجمع الخامس جمب مسجد المشير طنطاوي ومركز مصر للمعارض الدولية وقدام مركز المنارة للمؤتمرات الدولية.
- الموقع واللوكيشن: http://www.cairobookfair.org.eg/

مواعيد وايام عمل معرض الكتاب 2019-2020

معرض الكتاب شغال بداية من يوم 23 يناير لحد يوم 4 فبراير من الساعة 10 الصبح لحد الساعة 8 بليل كل ايام الاسبوع ماعدا يوم الجمعة شغال من الساعة 12 الظهر لحد الساعة 8 بليل. وفيه برامج وعروض كتير جداً بتتعمل تقدر تشوفها كاملة من هنا

مواصلات معرض الكتاب 2020 الجديد التجمع الخامس

مواصلات معرض الكتاب الجديد التجمع الخامس
مواصلات معرض الكتاب
علشان تروح المعرض اللي موجود في مركز مصر للمؤتمرات والمعارض في التجمع الخامس فيه كذا طريقة واسهلها الاتوبيسات النقل العام لانها بتروح مباشرة للمعرض وهتلاقي مكتوب عليها معرض الكتاب واسأل السواق برضو واتاكد من الاتوبيس وانت بتركبه انه رايح معرض الكتاب الجديد مش القديم. كمان معرض الكتاب عامل ديل كويس مع ابلكيشن مواصلات اسمه buseet واعتقد هتبقي اسعار المواصلات في الابلكيشن مش غالية تقدر تشوف الديل من علي الصفحة الرسمية لمعرض الكتاب من هنا علي فيسبوك

ازاي اروح معرض الكتاب من عبد المنعم رياض بالمترو؟

هتركب من هناك اي مواصلة لرمسيس من الموقف او تركب مترو اتجاه المرج او شبرا وتنزل محطة الشهداء ومن هناك هتخرج برا محطة المترو وتسأل علي ميكروباصات المعرض الجديد.

ازاي اروح معرض الكتاب من العباسية؟ 

هتركب اي ميكروباص او اتوبيس للحي السادس ومن هناك اي مواصلة للمعرض.

ازاي اروح معرض الكتاب من النزهة الجديدة؟

هتركب من النزهة اي مواصلة او اتوبيس او ميكروباص للسبع عمارات ومن هناك للمعرض.

اروح ازاي معرض الكتاب من الأميرية او المطرية؟

هتركب اي مواصلة من الاميرية او السواح لحد ميدان المطرية ومن ميدان المطرية فيه اتوبيسات وميكروباصات بتروح للمعرض اركبها واتاكد من السواق انه هيروح المعرض الجديد او مركز مصر للمؤتمرات والمعارض اللي في التجمع.

اروح ازاي معرض الكتاب من ميدان الجيزة؟

هتركب اي حاجة رايحة السيدة عائشة حتي لو مترو وتنزل هناك تسأل علي عربيات المعرض وبرضو متنساش تتاكد من السواق انه المعرض الجديد اوعي تنسي اديني بقولك.

اروح ازاي معرض الكتاب الجديد من مدينة السلام؟

هتركب اي مواصلة هتعدي علي الاوتوستراد وتنزل الاوتوستراد تركب اي ميكروباص او اتوبيس للمعرض.

اروح ازاي معرض الكتاب من مترو المظلات؟

هتركب اي مواصلة او مترو تنزل حدايق القبة ومن هناك ممكن تركب اتوبيس التجمع وتسأل السواق هيعدي علي المعرض ولا لا وتركب معاه او تشوف عربيات المعرض موجودة فين وتتاكد برضو انها بتاعت المعرض الجديد مش القديم.

ازاي اروح معرض الكتاب من حلوان؟

هتركب من حلوان للاوتوستراد ومن هناك هتركب لصقر قريش ومن هناك هتاخد مواصلة للمعرض.

اروح ازاي المعرض الجديد من مايو؟

هتركب من مايو للاوتوستراد ومن هناك لصقر قريش ومن صقر قريش هتركب ميكروباص او مواصلة للمعرض.

ازاي اروح معرض القاهرة الجديد للكتاب 2020 من الشرقية؟

 - هتركب من محطة قطر ابو كبير اي قطر متوجه للقاهرة هينزلك في محطة قطار رمسيس من هناك هتركب اي مواصلة للمعرض.
- او تركب من محطة قطر منيا القمح اي قطر رايح القاهرة رمسيس ومن هناك هتركب اي اتوبيس او مواصلة للمعرض.
- او تركب من محطة قطر ابو حماد ومن هناك هتركب القطر للقاهرة ومن القاهرة رمسيس هتركب اي ميكروباص او اتوبيس من بتوع المعرض الجديد ومتنساش تتأكد من السواق انه رايح المعرض الجديد اللي في التجمع الخامس محور المشير علشان متركبش غلط.

خريطة معرض القاهرة الدولي للكتاب التجمع الخامس 2019

الخريطة دي مهمة جداً علشان تعرف تتنقل بسهولة جوه المعرض من غير ما تسأل كتير وتوه وان شاء متحتاجش تلف وتسأل علي اي حاجة:
خريطة معرض القاهرة الدولي للكتاب التجمع الخامس 2019
خريطة معرض القاهرة الدولي للكتاب بالتفصيل

اسعار تذاكر معرض القاهرة للكتاب الجديد 2019-2020

سعر تذكرة معرض الكتاب السنة دي 5 جنية اول ما توصل عند المعرض هتلاقي بوابات كتير للمعرض شوف اقرب واحدة ليك ومن هناك اسأل علي شباك التذاكر او اسأل اي فرد امن فين شبابيك التذاكر الخاصة بالمعرض بعد ما تقطع التذكرة هتعدي علي جهاز كشف المعادن وتدخل بعدها المعرض ومبروك عليك/عليكي استمتع/استمتعي بوقتك وان شاء الله تقضي يوم جميل هناك. متنساش تشارك الموضوع ده مع صحابك علي فيسبوك وواتس اب علشان يعرفوا يروحوا زيك ويعرفوا باقي تفاصيل المعرض.

ابلكيشن معرض الكتاب للاندرويد والايفون

علشان تسهل علي نفسك ومتسألش كتير علي اسعار الكتب في معرض الكتاب حمل الابلكيشن الخاص بالمعرض وهتلاقي عليه كل التفاصيل والبيانات اللي محتاج تعرفها عن اي كتاب:-


لمعلومات اكتر + المصادر: 
أنت الان في اول موضوع
هل اعجبك الموضوع :

تعليقات

محتويات المقال